Փաշինյանն ու Պուտինը համաձայնել են նոր հանդիպման շուրջ

ՀՀ վարչապետ Նիկոլ Փաշինյանը հայտարարել է, որ ռուսական կողմի հետ բարձր մակարդակի հանդիպում նախատեսվում է անցկացնել հունիսի երկրորդ կեսին։

ՀՀ վարչապետ Նիկոլ Փաշինյանը կրկին բարձր է գնահատել Ռուսաստանի նախագահ Վլադիմիր Պուտինի հետ ապրիլյան հանդիպումը և լրագրողներին ասել, որ արդեն կա համաձայնություն առաջիկա հանդիպումների և միջոցառումների վերաբերյալ։ Նրա խոսքով՝ կողմերը պայմանավորվել են բարձր մակարդակի հանդիպումներ անցկացնել, այդ թվում՝ հունիսի երկրորդ կեսին։

Փաշինյանը նշել է նաև, որ հայ-ռուսական հարաբերությունները ներկայումս կառուցողական վերափոխման մեջ են, և ինքը դրական է վերաբերվում այդ գործընթացին։ Նա ընդգծել է, որ իրենց սկզբունքն է մնալ ռուսական կողմի հետ բարեկամական երկխոսության շրջանակում։

Վարչապետը կրկնել է իր նախկին հայտարարությունը, որ քանի դեռ կա հնարավորություն շարժվելու դեպի ԵՄ ինտեգրացիա և միաժամանակ մնալու Եվրասիական տնտեսական միության անդամ, Հայաստանը դա կանի։ «Երբ գա այն պահը, որ նրանք այլևս համատեղելի չլինեն, մենք որոշում կկայացնենք ժողովրդի հետ միասին», - ասել է նա։