Ուրիխանյանը մանդատը վայր դնելու դիմում չի ներկայացրել ԱԺ

Ազգային ժողովը «Բարգավաճ Հայաստան» խմբակցության պատգամավոր Տիգրան Ուրիխանյանից պատգամավորական մանդատը վայր դնելու դիմում չի ստացել: Այս մասին «Փաստինֆո»-ին հաղորդել են ԱԺ-ի հասարակայնության հետ կապերի բաժնից:

Նշենք, որ հունիսի 14-ին Ուրիխանյանն իր ֆեյսբուքյան էջում գրառում էր կատարել և հայտարարել, որ պատրաստվում է մանդատը վայր դնել:

«Եկել է աշխատանքային լիազորություններս դադարեցնելու պահը: Պատճառների մասին կխոսեմ ավելի ուշ»,- գրել էր ԲՀԿ պատգամավորը:

«Փաստինֆո»-ն գրավոր հարցմամբ խնդրել էր ԱԺ նախագահին տեղեկացնել, թե արդյոք մանդատից հրաժարվելու մասին դիմում ստացել են, թե ոչ։

«Հայտնում ենք, որ ԱԺ-ն նման դիմում չի ստացել»,- նշված է ԱԺ պատասխանում։