Թուրքիայի դեսպանը կանչվել է Իրանի ԱԳՆ

Թեհրանում Թուրքիայի դեսպանին հրավիրել են Իրանի ԱԳՆ, որտեղ նրան ընդունել է Իրանի արտգործնախարարի օգնական Մահմուդ Հայդարին։ Հանդիպման ընթացքում Հայդարին, անդրադառնալով Թուրքիայի արտգործնախարար Հաքան Ֆիդանի վերջին հայտարարություններին, ընդգծել է երկկողմ հարաբերություններին վնասող հայտարարություններից խուսափելու անհրաժեշտությունը:

Իր հերթին Թեհրանում Թուրքիայի դեսպան Հիջաբի Կարլանկիչը հաստատել է իր երկրի դիրքորոշումը Իրանի հետ բարիդրացիական հարաբերությունների պահպանման և ընդլայնման հարցում։

Թուրքիայի արտգործնախարար Հաքան Ֆիդանը Al Jazeera-ին տված հարցազրույցում ավելի վաղ ասել էր, որ Իրանը «մեծ ռեսուրսներ է զոհաբերել տարածաշրջանում իր նվաճումների համար»։ Նրա խոսքով՝ արտաքին քաղաքականության այս մոտեցումը պետք է փոխվի: