ԱՄՆ–Իրան բանակցությունների հիմնական թեմաները. Reuters

ԱՄՆ-ի և Իրանի միջև նախատեսվող բանակցությունների օրակարգում ընդգրկված են մի շարք առանցքային հարցեր, որոնց շուրջ կողմերը պահպանել են տարբեր դիրքորոշումներ։ Reuters-ի փոխանցմամբ՝ Թեհրանը կարևորում է Լիբանանում ռազմական գործողությունների դադարեցումը՝ պնդելով, որ այն պետք է դիտարկվի ընդհանուր համաձայնության շրջանակում, մինչդեռ Վաշինգտոնը և Իսրայելը դա չեն կապում երկկողմ բանակցությունների հետ։

Իրանը նաև պահանջում է իր սառեցված ակտիվների ապաբլոկավորում և պատժամիջոցների վերացում։ ԱՄՆ-ը, ըստ աղբյուրի, պատրաստակամություն է հայտնում որոշակի մեղմացման, սակայն դա պայմանավորում է Իրանի կողմից միջուկային և հրթիռային ծրագրերի սահմանափակումներով։ Բացի այդ, Թեհրանը ձգտում է, որ ճանաչվի իր վերահսկողությունը Օրմուզի նեղուցի նկատմամբ՝ անցման վճար սահմանելու իրավունքով, ինչին Վաշինգտոնը հակադրվում է՝ պնդելով բաց և ազատ նավարկություն։

Քննարկման թեմաների թվում է նաև պատերազմի ընթացքում հասցված վնասների փոխհատուցման հարցը, որի վերաբերյալ ԱՄՆ-ը հրապարակային մեկնաբանություն չի տվել։ Իրանը շարունակում է պնդել ուրանի հարստացման իրավունքը և հրթիռային զինանոցի անխախտելիությունը, մինչդեռ ամերիկյան կողմը դրանք դիտարկում է որպես սահմանափակման ենթակա ոլորտներ։

Բացի այդ, Թեհրանը պահանջում է ամերիկյան զորքերի դուրսբերում տարածաշրջանից և փոխադարձ չհարձակման պարտավորություն։ ԱՄՆ նախագահ Դոնալդ Թրամփը հայտարարել է, որ ամերիկյան ռազմական ներկայությունը կպահպանվի մինչև խաղաղ համաձայնության ձեռքբերումը և զգուշացրել է հնարավոր սրացման մասին դրա բացակայության դեպքում։