Վաշինգտոնը պետք է որոշում կայացնի. Ղալիբաֆ

Իրանի խորհրդարանի խոսնակը հայտարարել է, որ Վաշինգտոնը պետք է քայլեր ձեռնարկի Թեհրանի վստահությունը վերականգնելու համար։

Իրանի խորհրդարանի նախագահ Մոհամադ Բաղեր Ղալիբաֆը X սոցիալական ցանցի իր էջում անդրադարձել է բանակցային գործընթացին և հայտարարել, որ ամերիկյան կողմին չի հաջողվել շահել իրանցի բանագնացների վստահությունը։ Ըստ պաշտոնյայի՝ չնայած իրանական «Մինաբ-168» պատվիրակության կողմից ներկայացված կառուցողական և հեռանկարային նախաձեռնություններին, արդյունքը մնում է անորոշ։

Ղալիբաֆն ընդգծել է, որ Միացյալ Նահանգներն արդեն ծանոթ է Իրանի որդեգրած սկզբունքներին և տրամաբանությանը։ Նրա խոսքով՝ այժմ Վաշինգտոնն ինքը պետք է կողմնորոշվի և որոշում կայացնի, թե արդյոք պատրաստ է գործնական քայլերով ապացուցել իր հուսալիությունը և վերականգնել կողմերի միջև առկա վստահության պակասը։

Խորհրդարանի ղեկավարը վերահաստատել է, որ Թեհրանը բանակցություններին ներկայացել է բարի կամքով և հաստատակամությամբ, սակայն նախկին փորձը թույլ չի տալիս անվերապահորեն վստահել հակառակ կողմին։ Նա նշել է, որ Իրանը դիվանագիտությունը դիտարկում է որպես ժողովրդի իրավունքների պաշտպանության ուղի՝ զուգահեռաբար շարունակելով ամրապնդել երկրի պաշտպանական ձեռքբերումները։

Իրանական կողմի դիրքորոշումը մնում է անփոփոխ. դիվանագիտական ջանքերը չեն դադարեցվելու, սակայն դրանք պետք է հիմնված լինեն փոխադարձ հարգանքի և իրանական կողմի ազգային շահերի ապահովման վրա։