ՌԴ քաղաքացին Ford Fusion-ով վրաերթի է ենթարկել 2 տղա երեխաների

Այսօր՝ օգոստոսի 9-ին, վրաերթ է տեղի ունեցել Լոռու մարզում։ Ժամը 16։40-ի սահմաններում ՌԴ քաղաքացի, ՌԴ-ի բնակիչ, 36-ամյա Արտյոմ Տ․-ն իր վարած Ford Fusion մակնիշի ավտոմեքենայով Սպիտակ քաղաքի Ջրաշեն բնակավայրի 1-ին փողոցի սկզբնամասում վրաերթի է ենթարկել հետիոտներ՝ Լոռու մարզի բնակիչներ 13-ամյա Սմբատ Ա․-ին և 12-ամյա Հարություն Ա․-ին։
 

Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, ահազանգել է շտապօգնություն և օպերատիվորեն ժամանած Սպիտակի բժշկական կենտրոնի բժիշկները նախ տեղում առաջին բուժօգնությունն են ցուցաբերել երեխաներին, ապա տեղափոխել «Սպիտակ» բժշկական կենտրոն։
 

Տեղում էլ Սպիտակի հիվանդանոցի բժիշկներն անհրաժեշտ օգնությունը ցուցաբերել, ապա երեխաներին ռեանիմոբիլով տեղափոխել են Երևանի «Սուրբ Աստվածամայր» բժշկական կենտրոն։
 

Քննիչի հանձնարարականով ավտոմեքենան տեղափոխվել է Ոստիկանության Սպիտակի բաժնի պահպանվող հատուկ տարածք։