Լուկաշենկոն ներում է շնորհել 31 ուկրաինացու

Բելառուսի նախագահ Ալեքսանդր Լուկաշենկոն ներում է շնորհել Ուկրաինայի 31 քաղաքացու, և նրանց Ուկրաինա վերադարձի գործընթացը արդեն մեկնարկել է։ Այս մասին հայտնել է Բելառուսի առաջնորդի մամուլի քարտուղար Նատալյա Էյսմոնտը, փոխանցում է ՌԻԱ «Նովոստին»։

Էյսմոնտի խոսքով՝ համաներման այս քայլը կատարվել է ԱՄՆ նախագահ Դոնալդ Թրամփի և Լուկաշենկոյի միջև ձեռք բերված պայմանավորվածությունների շրջանակներում։

Ուկրաինայի խնդրանքով և հարևան երկրում զինված հակամարտության կարգավորման համար անհրաժեշտ պայմաններ ստեղծելու նպատակով, Մինսկը առաջնորդվել է մարդասիրական սկզբունքներով և հանդես եկել բարի կամքի դրսևորումով։

«Նախագահը ներում է շնորհել մեր երկրում քրեական հանցագործություններ կատարած 31 ուկրաինացի քաղաքացու»,– նշել է Էյսմոնտը: