Ռուսաստանը նոր խստացումներ է սահմանել Հայաստանի համար

ՌԴ-ն հայտարարել է, որ Հայաստանից մատակարարվող արտադրանքի նկատմամբ սահմանվել են ավելի խիստ պահանջներ։

Հայաստանից Ռուսաստան մատակարարվող բուսական և անասնաբուժական արտադրանքի վերաբերյալ մի քանի տարի առաջ առաջացած բողոքները շարունակվում են։ Խնդրի լուծում կարող է լինել ԵԱՏՄ շրջանակում տեղեկատվական համակարգերի ինտեգրումը, որը կապահովի արտադրանքի հետագծելիությունը, հայտարարել է «Ռոսսելխոզնադզորի» ղեկավար Սերգեյ Դանկվերտը։

«Հայաստանից եկող արտադրանքի տեսականին և քանակը ենթադրում են, որ դրանցից ոչ բոլորը հայկական ծագում ունեն։ Մենք այս հարցը լուծել ենք և՛ 2024, և՛ 2023 թվականներին», – նշել է Դանկվերտը

Նրա խոսքով՝ խնդիրը կապված է մատակարարումների անտրամաբանական աճի հետ, որը պայմանավորված է ԵԱՏՄ շրջանակում շուկա մուտք գործելու պարզեցված ընթացակարգերով։ 

«Օրինակ, երեք տարվա ընթացքում Հայաստանը ծաղիկների առաքումները 36 միլիոնից ավելացրել է մինչև ավելի քան 100 միլիոն։ Աճ է գրանցվել նաև այլ տեսակի արտադրանքի մեջ։ Մենք ստիպված էինք բուսասանիտարական ստուգումները տեղափոխել սահմանին ավելի մոտ։ Մենք նաև տեսանք, որ Ռուսաստան ուղարկված արտադրանքի մեծ քանակությունը չէր հասնում նախատեսված նշանակման վայրեր»։

Դանկվերտը հայտարարել է, որ երկար ժամանակ կարգավորում է իրականացվում, որի արդյունքում արձանագրվել է կարանտինային ապրանքների մեծ թիվ։ Նրա խոսքով՝ Հայաստանում հայտնաբերվում է ավելի քան 900 կարանտինային ապրանք, ինչը բարդացնում է աշխատանքը։

Խոսելով անասնապահական մթերքների մատակարարումների մասին՝ նա ընդգծել է, որ այս ոլորտում ևս «առաքվող որոշ ապրանքներ կարող են նաև ոչ հայկական ծագում ունենալ»։

Նրա խոսքով՝ այս հանգամանքները հանգեցրել են Հայաստանից առաքումների նկատմամբ ավելի խիստ պահանջների կիրառմանը։