Թուրքիայի փոխնախագահը` ՀՀ-ի հետ սահմանների հնարավոր բացման մասին

Հայաստանի հետ հարաբերությունների կարգավորման ընթացքը Թուրքիայում գնահատում են որպես փուլային և փոխադարձ վստահության վրա հիմնված գործընթաց։ Այդ մասին հայտարարել է Թուրքիայի փոխնախագահը՝ նշելով, որ արդեն իրականացվել են մի շարք գործնական քայլեր։

Նրա խոսքով՝ այս շրջանակում արձանագրվել են որոշ առաջընթացներ, այդ թվում՝ երկաթուղային հաղորդակցության վերականգնման, էլեկտրոնային վիզայի համակարգի ներդրման և ավիաչվերթների թվի ավելացման ուղղությամբ։ Նա նաև անդրադարձել է Անիի կամրջի վերականգնման նախագծին՝ այն ընդգրկելով ընթացիկ համագործակցության թեմաների շարքում։

Թուրքիայի փոխնախագահի հայտարարությամբ՝ Հայաստանի և Թուրքիայի, ինչպես նաև Հայաստանի և Ադրբեջանի միջև ցամաքային սահմանների բացումը կարող է դառնալ տարածաշրջանում խաղաղության և կարգավորման գործընթացների ամենակոնկրետ արդյունքներից մեկը։ Նրա պնդմամբ՝ այդ ուղղությամբ շարունակվում են տեխնիկական նախապատրաստական աշխատանքները և ձևավորվում է անհրաժեշտ ենթակառուցվածքը։

Նա նաև նշել է, որ հայ-ադրբեջանական երկխոսության շրջանակում վերջին շրջանում իրականացվող քայլերը նպաստում են ընդհանուր կարգավորման արագացմանը։ Թուրքիայի փոխնախագահի գնահատմամբ՝ Հայաստանի և Ադրբեջանի միջև կապերի խորացմանը զուգահեռ ավելի արագ կարող է ընթանալ նաև Անկարայի և Երևանի միջև հարաբերությունների կարգավորման գործընթացը։