Հայաստան-Վրաստան սահմանին կուտակված բեռնատարների խնդիրը լուծվել է․ Փաշինյան

Վարչապետ Նիկոլ Փաշինյանն այսօր Ազգային ժողովում հայտարարեց, որ հայ-վրացական սահմանին կուտակված բեռնատարների խնդիրը լուծվել է։ Վրաստանի իշխանությունները մինչ այդ արգելափակել էին այդ բեռնատարների մուտքը, քանի որ դրանք եկել էին Իրանից։

Փաշինյանը բացատրեց, որ Վրաստանի իշխանությունների հետ պայմանավորվածություն ունեն, և վերջնական որոշումը պետք է կայացնեն ընդունող երկրները, օրինակ՝ Ռուսաստանը։ Եթե ընդունող երկիրը համաձայն է, որ Իրանից եկած բեռնատարները մտնեն իրենց երկիր, ապա Վրաստանի իշխանությունները, ըստ Փաշինյանի, պատրաստ են այդ բեռնատարներն ուղեկցել մինչև սահման։

Ըստ Փաշինյանի՝ լուծման ուղին գտնվել է, և բեռնատարները այսօր-վաղը կշարժվեն։